Gen 29 | BMU | STEP | Jeikobnöŋ mewö jiba mosöta könaŋi toroqeba anda wehön kotkotŋaŋgö könagesö yeŋgö gölmenöŋ aŋgorök.

Genesis 29

Jeikobnöŋ Labangö mire aŋgorök.

1 Jeikobnöŋ mewö jiba mosöta könaŋi toroqeba anda wehön kotkotŋaŋgö könagesö yeŋgö gölmenöŋ aŋgorök. 2 Miaŋgöreŋ aŋgota gölme köröŋe o löm kun ehök. Miri toŋi yeŋön lama kambuŋini eŋguaŋgita miaŋgöreŋ o eŋgiba malget. Nalö miaŋgöreŋ o löm miaŋgö kösutŋe lama kambu karöbut ahögetka o löm numbuŋaŋgö kötŋi ketaŋi mi qahö metalget. 3 Lama galöm yeŋön mutuk lama kambuŋini pakpak miaŋgöreŋ tokom eŋgiba köt mi o löm numbuŋeyök gwililöŋgöba lamaurupŋini o eŋgiget negetka köt mi kunbuk dundumŋe köla malget.

4 Jeikobnöŋ lama galöm mi kewö qesim eŋgiyök: “Azi alaurupni, iŋini denikegöra?” Qesim eŋgiiga “Nini Harangöra,” mewö meleŋ waŋgiget.

5 Meleŋ waŋgigetka kewö qesim eŋgiyök: “Iŋini Nahorgö isiŋi Laban möt waŋgize me qahö?” Qesim eŋgiiga “Ölöp möt waŋgizin,” jiget.

6 Jigetka kewö qesim eŋgiba jiyök: “I ölöp malja me qahö?” Mewö jiiga kewö jiget: “I ölöp malja. Eknöŋ, yaŋgö böratŋi Reizölnöŋ mönö endu lama eŋguaŋgita kaza.”

7 Mewö jigetka Jeikobnöŋ jiyök: “Eket, wehön ketaŋi ahöiga lama mi suŋgemgöra tokom eŋgibingö nalöŋan qahö töriza. Miaŋgöra ölöp lamaŋini o eŋgiget negetka kunbuk eŋguaŋgita malmalŋine anda al eŋgigetka neneŋamŋini neme.”

8 Mewö jiiga kewö meleŋget: “Mewö ölöp qahö akin. Mutuk lama kambu pakpak tokom eŋgiba köt mi o löm numbuŋeyök gwililöŋgöbagun mönö lamaurupnini o eŋgiinga neme.”

9 Jeikobnöŋ yembuk keu mewö eraum-möta kingetka miaŋgöreŋök Reizölnöŋ iwiŋaŋgöreŋ lama kambuŋi eŋguaŋgita kayök. Reizöl yaŋön lama galöm nup memba malök. 10 Kaiga Jeikobnöŋ ehonŋaŋgö böratŋi Reizöl aka ehonŋaŋgö lama kambuŋi eŋgeka o löm numbuŋe anda köt mi metala ehonŋi Labangö lamaurupŋi o eŋgiyök. 11 Eŋgim teköba Reizöl numbu yöhötim nemba könahiba köhöikŋi qeta sahörök.

12 Sahöta Reizölgöra jiyök: “Ni göhö iwigahö tinitosolomŋi akzal. Ni Rebekagö nahönŋa. “Mewö jiiga Reizölnöŋ möta ösumŋan kiŋkiŋgöba iwiŋaŋgöreŋ anda buzup mi jii mörök. 13 Labanöŋ nenŋaŋgö nahönŋi Jeikobkö buzupŋi möta i ösumok miwikŋaimamgöra anök. Anda miwikŋaiba eka aŋgöm waŋgiba numbuŋi yöhötim nemba waŋgita miriŋe öŋgöyohot. Öŋgöba yuai pakpak asuhuyöhi, Jeikobnöŋ miaŋgö kösohotŋi jii mörök. 14 Mi möta kewö jiyök: “Ölöp, göŋön nani sepkitipni akzan. “Mewö jiiga köiŋ mohotkö dop yambuk tata malök. Mewö.

Jeikobnöŋ Lea aka Reizöl anömyahötŋa etkömeyök.

15 Mewö maliga Labanöŋ Jeikob kewö jii mörök: “Gi tinitosolomni maljanaŋgöra töwagi qahö öne welen qem niŋgibanbuk. Mi qahö dop kölma. Miaŋgöra töwagi dawik memangö mötzani, mi ölöp jinöŋga mötmam.” 16 Labangö böratyahötŋi yahöt malohot. Ketaŋaŋgö qetŋi Lea. Munŋaŋgö qetŋi Reizöl. 17 Leagö jeŋan eksihimŋambuk ahökmö, Reizölgö sileŋaŋgö kaisoŋgolomŋi aka jemesoholŋi mi körek eksihimŋambuk kötökŋi ahök.

18 Jeikobkö urusihimŋi mi Reizölgöreŋ ahöyöhaŋgöra aka keu kewö jiyök: “Nöŋön böratki könaŋgepŋi Reizöl memamgöra ölöp yambu 7 welen qem gihiba malmam.”

19 Mewö jiiga kewö jiyök: “I azi murutŋi kun waŋgibiga qahö dop kölbapukmö, gi gihibiga dop kölma. Miaŋgöra ölöp nömbuk ki malman.” 20 Mewö jiiga Reizöl memamgöra yambu 7 welen qem waŋgiba malök. Urusihimŋan Reizölgöra ahöhaŋgöra aka yambu mieŋgö möriga wehön awamŋi tandök ahök. Mewö.

21 Yambu 7 teköiga Jeikobnöŋ ehonŋi Laban kewö jii mörök: “Nöŋgö nup meme nalönan lök teközawaŋgöra ölöp anömni Reizöl niŋginöŋga yambuk ahöba malmam.” 22 Labanöŋ keu mi möta miri toŋi pakpak öröm tokom eŋgiba lömbuaŋ aliga nem söŋgaip aket. 23 Mi aket teköiga miri söŋauiga Labanöŋ böratŋi Lea waŋgita anda Jeikob waŋgiiga miri uruŋe öŋgöba mohotŋe ahöyohot. 24 Labanöŋ welen ambiŋi qetŋi Zilpa mi böratŋi Leagö welenqeqeŋa malmapköra waŋgiyök. 25 Mohotŋe ahöyohotka miri giaŋiiga Jeikobnöŋ anömŋi eka möri Reizöl qahöpmö, i Lea aiga yöwöŋaŋgöreŋ anda kewö jim waŋgiyök: “Gi mönö wani kimbia ak niŋgizane? Ni Reizöl memamgöra welen qem gihiba malalmö, gi mönö wuanöŋgöra tilipköm niŋgizan?”

26 Mi möta meleŋda kewö jiyök: “Gölme kiaŋgöreŋ datŋi öne maliga munŋan azi memapkö ahakmemeŋi mi neŋgöreŋ qahö ahöza. 27 Miaŋgöra ölöp maren sösöŋgai mi Leabuk sonda mohotkö dop mal söŋgainöŋ teköiga munŋi mewöyök gihimam. I memangöra mönö mewöyök yambu 7 toroqeba welen qem niŋgiba malman.”

28 Mewö jiiga urumohot aka Leabuk maren sösöŋgai nalö mi sonda mohotkö dop mali teköiga Labanöŋ böratŋi Reizöl mewöyök anömŋi akŋapköra waŋgiyök. 29 Labanöŋ welen ambiŋi qetŋi Bilha mi böratŋi Reizölgö welenqeqeŋa malmapköra waŋgiyök. 30 Jeikobnöŋ Reizöl i mewöyök anömŋa meyök. Urusihimŋan Reizölgöra ahöyöhaŋgöra aka Reizöl mi Lea oŋgita jöpaköm waŋgiba malök. Miaŋgöra yambu 7 toroqeba Laban welenŋi qem waŋgiba malök. Mewö.

Jeikobkö moröurupŋi asuhuget.

31 Jeikobkö uruŋan Leagö gwötpuk qahö ahöiga boromdökŋi tököiga Kembunöŋ ehi qahö dop köliga Lea gölöm almapköra bauköm waŋgiyökmö, munŋi Reizölnöŋ köpinŋa malök. 32 Leanöŋ köröbuk aka mala morö azia memba keu kewö jiyök, “Kembunöŋ tapötkokorokni ehiga apnan ölöp könahiba jöpaköm niŋgiba malma. “Mewö jiba qetŋi miaŋgö dop Ruben qerök. (Ruben Tapötkokorokni ehök.) 33 Könaŋgep kunbuk körö ala morö azi kun memba keu kewö jiyök: “Apnan boromdökŋi jöpaköm niŋgiiga Kembunöŋ mi möta morö ki mewöyök niŋgiza. “Mewö jiba qetŋi miaŋgö dop Simeon qerök. (Simeon Kezapŋan mörök.)

34 Miaŋgö andöŋe kunbuk körö ala morö azi kun memba keu kewö jiyök: “Ni nahönurupŋi karöbut apnaŋgöra mealaŋgöra yaŋön mönö könahiba uruŋi nömbuk jöhöma. “Mewö jiba qetŋi miaŋgö dop Liwai qerök. (Liwai Uruŋi jöhöma.) 35 Miaŋgö andöŋe dumŋe kunbuk körö ala morö azi kun memba keu kewö jiyök: “Nöŋön nalö kewöŋe Kembu möpöseizal. “Miaŋgöra qetŋi miaŋgö dop Juda (möpöseip) qerök. Miaŋgö andöŋe morö kunbuk qahö meyök. Mewö.